समाचारहरू

१६ वर्षीया बालिकालाई बलात्कार र गर्भपतन गराएको कसुरमा व्यास नगरपालिका–९ अँधेरी भन्ज्याङका २६ वर्षीय किसान कुमाललाई जिल्ला अदालतले १० वर्ष कैद सजायको फैसला सुनाएको छ ।

न्यायधिश कोमलप्रसाद आचार्यको जेठ ११ गतेको इजलासले कसुर ठहर गर्दै आरोपितलाई १० वर्षको कैद सजाय फैसला गरेको जिल्ला अदालतका श्रेस्तेदार मिनबहादुर कुँवरले जानकारी दिनु भयो ।

आरोपित कुमालले पीडितलाई २०७८ र्काित्तक २८ गते बलात्कार गरेको र त्यसपछि २०७८ पुस २३ गते औषधी खुवाएर गर्भपतन गराएको आरोपमा पीडित परिवारले पुस २४ गते जिल्ला प्रहरी कार्यालयमा उजुरी दिएका थिए ।

आरोपितलाई प्रहरीले ०७८ पुस २६ गते गिरफ्तार गरेको थियो ।

पीडितको स्वास्थ्य परीक्षण ०७८ पुस २४ गते दमौली अस्पतालमा गरिएको थियो ।

जिल्ला सरकारी वकिल कार्यालयले ०७८ माघ २१ गते कुमालको विरूद्धमा जिल्ला अदालतमा मुद्दा दर्ता गरेकोमा आरोपितलाई अदालतको आदेशमा माघ २२ गतेदेखी पुर्पक्षकोलागि थुनामा राखिएको थियो ।

प्रकाशचन्द्र भट्टराई