बलात्कार घटना रूपियाँ लिएर मिलापत्र गराएको आरोपमा सात जना गिरफ्तार

 

बलात्कार घटनामा १८ लाख रूपियाँ लिएर मिलापत्र गरेको आरोपमा  प्रहरीले कोहलपुर नगरपालिका –११ का ५३ वर्षीय पवित्रा ढकाल, सोही ठाउँकी ३२ वर्षीया माया हमाल, ३५ वर्षीया सञ्जना थारू,  कोहलपुर नगरपालिका –१२ का ३२ वर्षीय विजय पोखरेललाई असार १७ गते  गिरफ्तार गरेको छ ।

यसैगरी, प्रहरीले पीडितका बुवा ४२ वर्षीय, आमा ४० वर्षीया र कोहलपुर  नगरपालिका –११ की ४० वर्षीया शोभा चौधरीलाई असार १८ गते  घरबाट गिरफ्तार गरेको र थप चार जना आरोपितको पक्राउ पुर्जी जारी भएको इलाका प्रहरी कार्यालयका डिएपसपी सुन्दर तिवारीले बताउनु भयो ।

आरोपित पक्षले पीडितको घरमा गएर १८ लाख रूपियाँ दिएर मिलापत्र गर्न धम्की दिएको र पीडितलाई चित्त नबुझेपछि इलाका प्रहरी कार्यालय, कोहलपुरमा असार १७ गते उजुरी दिएको  डिएसपी तिवारीले बताउनु भयो ।

१८ वर्षीया युवतीलाई ०८० जेठ ६ गते बलात्कार गरेको आरोपमा कोहलपुर नगरपालिका –२ का २० वर्षीय अभि थारू विरूद्ध पीडित पक्षले जेठ ३२ गते इलाका प्रहरी कार्यालय कोहलपुरमा उजुरी दिएका थिए ।

प्रहरीले आरोपितलाई जेठ ३१ गते घरबाट गिरफ्तार गरेको थियो ।  पीडितको स्वास्थ्य परीक्षण जेठ ३२ गते भेरी अस्पतालमा गरिएको थियो ।


लक्ष्मी थारू