बलात्कार घटनाको मुद्दा मुल्तबीमा

  ०८० मङ्सिर २१ गते

१८ वर्षीया युवतीलाई बलात्कार गरेका आरोपित डाक्नेश्वरी नगरपालिका–९ पत्थरगाढा मुस्लिम टोलका २२ वर्षीय मो जियाउद्दिनविरुद्धको मुद्दा ०८० मङ्सिर २१ गते मुल्तबीमा राख्ने फैसला भएको छ ।

जिल्ला अदालतमा मङ्सिर २१ गते अभियोग पत्र दायर भएकोमा न्यायाधीश हरिश्चन्द्र इङ्गनामको इजलासले सोही दिन मुद्दा मुल्तबीमा राख्ने फैसला भएको अदालतले जनाएको छ ।

आरोपितले २०७९ साउन १५ गते साँझ बलात्कार गरेको भन्दै पीडितकी आमाले ०७९ साउन १९ गते जिल्ला प्रहरी कार्यालयमा उजुरी दिनुभएको थियो । खेतमा काम गरी घरतर्फ आइरहेका बेला गम्छाले मुख थुनी डरत्रास देखाई कब्रिस्तान नजिकको जङ्गगलभित्र बलात्कार गरी आरोपित फरार भएको पीडितले बताउनु भयो ।

जिल्ला प्रहरी कार्यालयले ०७९ साउन २० गते उजुरी दर्ता गरेको थियो । पीडितको स्वास्थ्य परीक्षण साउन २० गते नै गजेन्द्रनारायण सिंह अस्पतालमा भएको थियो । जिल्ला अदालतले ०७९ साउन २६ गते आरोपितलाई पक्राउ गर्न अनुमति दिए पनि आरोपित गिरफ्तार भएका छैनन् ।


मनोहर कुमार पोखरेल