समाचारहरू

१७ वर्षीया बालिकालाई बलात्कार गरेको कसुरमा तिरहुत गाउँपालिका–३ का २३ वर्षीय ज्ञानु भनिने ज्ञानकुमार साहलाई जेठ १९ गते १० वर्ष कैद सजाय भएको छ ।

जिल्ला न्यायाधीश हेमन्त रावलको इजलासले आरोपितलाई कसुर ठहर गर्दै १० वर्ष कैद सजायका साथै ५० हजार रुपियाँ क्षतिपूर्ति दिनुपर्ने र फौजदारी कसुर पीडित राहत कोषमा १ हजार ३ सय रुपियाँ भराउनु पर्ने फैसला गरेको छ ।

घरमा शौचालय नभएका कारण पीडित घरनजिकैको बाँसघारीमा ०७७ कात्तिक ८ गते निक्लेकी थिइन् । रातको ८ बज्न लागेकाले एक्लै जान डर मानेकी उनले १९ वर्षीया किशोरीलाई साथ लिएर गएको बताइन् ।

अध्यारोमा च्याप्प समाती मुख थुनेर आरोपित र सोही ठउँका १९ वर्षीय सुनिलकुमार साहले करिब चार सय मिटर टाढा लगेको पीडितले बताइन् । पीडितका अनुसार उनी बलात्कृत भइन् भने अर्की १९ वर्षीया किशोरीमाथि बलात्कारको प्रयास भयो । मध्यराति घटनाको जानकारी पाएर पौने १ बजे घटनास्थल पुगेको प्रहरीले बलात्कार प्रयासका आरोपित सुनिललाई तत्कालै घरबाट गिरफ्तार गर्‍यो ।

पीडितको ०७७ कात्तिक ९ गते राजविराजस्थित गजेन्द्रनारायण सिंह अस्पतालमा स्वास्थ्य परीक्षण भयो ।

बलात्कारबाट पीडित बालिकाकी आमाले र बलात्कार प्रयासबाट पीडित किशोरीकी माइजूले ०७७ कात्तिक १० गते दिएको छुट्टा–छुट्टै उजुरी इलाका प्रहरी कार्यालय कञ्चनरुपमा दर्ता भयो।

आरोपित ज्ञानु जिल्ला न्यायाधीश हेमन्त रावलको इजलासले ०७९ पुस १२ गतेदेखि पुर्पक्षका लागि राजविराज कारागारमा थुनामा छन् ।

मनोहरकुमार पोखरेल