समाचारहरू

१८ वर्षीया युवतीलाई बलात्कार गरेको आरोपमा खडक नगरपालिका–५ खोजपुरका २६ वर्षीय सन्तोष साह गिरफ्तार भई असोज ९ गते थुनामा परेको प्रहरीले जनाएको छ ।

जिल्ला न्यायाधीश हर्कबहादुर क्षेत्रीको इजलासमा घटनाको ७ महिना पछि गिरफ्तार हुनासाथ आरोपित पुर्पक्षका लागि राजविराज कारागारमा थुनामा परेका हुन् ।

आरोपितले २०७९ चैत १० गते बलात्कार गरेको र सिरहाको कर्जन्हा नगरपालिका–४ बडहरामाल घर भई हाल खडक नगरपालिका–५ खोजपुर बस्ने २८ वर्षीय बिर्जु भनिने बिरजुन साह हलुवाइले सहयोग गरेको भन्दै पीडितले इलाका प्रहरी कार्यालय कडरबोनामा चैत २० गते उजुरी दिनुभएको थियो । पीडितका अनुसार तरकारी बिक्री गरेर साँझ घर फर्किदै गर्दा साइकल बिग्रिएकाले बिर्जुले मर्मत गरिदिने आश्वासन दिई रात परेपछि मुख थुनी खडक नगरपालिका–५ खरचुहियास्थित आफ्नो घर लगी कोठामा थुनेको र अर्का आरोपित सन्तोषले बलात्कार गरेका हुन् ।

पीडितको स्वास्थ्य परीक्षण गजेन्द्रनारायण सिंह अस्पतालमा चैत २० गते भएको थियो । गाउँघरबाटै आरोपित बिर्जुलाई चैत २० गते प्रहरीले गिरफ्तार गरेको थियो । जिल्ला अदालतमा ०८० वैशाख १४ गते अभियोगपत्र दायर भएकोमा जिल्ला न्यायाधीश श्यामविहारी मौर्यको वैशाख १५ गतेको इजलासले बिर्जु १ लाख रुपियाँ धरौटी राखी पुर्पक्षका लागि तारेखमा रिहा भएका छन् । फरार रहेका आरोपित सन्तोषाविरुद्ध चैत २० गते र वैशाख १० गते पक्राउ पुर्जी जारी भएको थियो ।

मनोहरकुमार पोखरेल