समाचारहरू

५५ वर्षीया महिलालाई बलात्कार गरेको आरोपमा फरार रहेका बोदे बर्साइन नगरपालिका-६ फुलकाहीका ५२ वर्षीय बैद्यनाथ दास ०८१ साउन ३० गते सप्तरी जिल्ला अदालतमा हाजिर भएका छन् ।

हाजिर भएका आरोपितले धरौटी रकम बुझाउन नसकेपछि पुर्पक्षका लागि साउन ३० गते राजविराज कारागारमा थुनामा परेका छन् । जिल्ला न्यायाधीश दीपककुमार दाहालको इजलासले पुर्पक्षका लागि तारेखमा रिहा गर्न आरोपितसँग तीन लाख रुपियाँ धरौटी माँग गरेको थियो ।

आरोपितले २०८० असार ७ गते साँझ ७ बजे बलात्कार गरेको भन्दै पीडितले असार ८ गते इलाका प्रहरी कार्यालय कडरबोनामा उजुरी दिनुभएको थियो । घरदेखि पूर्व छिमेकिको घरबाट खोर्सानी लिन गएका बेला चौरीमा आरोपितले बलात्कार गरेको पीडितले बताउनु भयो ।

पीडितको स्वास्थ्य परीक्षण गजेन्द्रनारायण सिंह अस्पतालमा ०८० असार ८ गते भएको थियो । इलाका प्रहरी कार्यालय कडरबोनामा ०८० पुस २ गते आरोपितविरुद्ध उजुरी दर्ता भएको थियो । फरार रहेका आरोपितविरुद्ध अदालतबाट ०८० मङ्सिर २५ गते पक्राउपुर्जी जारी भएको थियो । आरोपित फेला नपरेपछि जिल्ला अदालतमा ०८१ असार ७ गते अभियोग पत्रदायर भएको थियो ।

मनोहरकुमार पोखरेल