बलात्कार घटनाका पीडितलाई कानुनी प्रकृयामा लैजान इन्सेकको सहयोग

  ०७९ असार २१ गते

१७ वर्षीया एक बालिकालाई सामुहिक बलात्कार भएको घटनाका पीडितलाई कानुनी प्रकृयामा लैजान असार २१ गते अनौपचारिक क्षेत्र सेवा केन्द्र (इन्सेक) ले सहयोग गरेको छ ।

आर्थिक अवस्था कमजोर भएका कारण कानुनी प्रक्रियामा पुग्न समस्या भएको भन्दै इन्सेकद्वारा गठित जिल्ला स्तरीय सिफारिस संयन्त्र, जुम्लामा सहयोगको लागि पीडितले जेठ २५ गते निवेदन दिएपछि इन्सेकबाट सहयोग रकम हस्तान्तरण भएको हो ।

मानव अधिकार सहायता कक्षको असार १० गतेको निर्णय अनुसार उक्त रकम हस्तान्तरण गरिएको इन्सेकका कार्यक्रम संयोजक किरण पौडेलले जानकारी दिनु भयो ।

गोठीचौर गाउँपालिका–५ का २० वर्षीय विवेक गिरी र सोही ठाउँका २० वर्षीय पारस देवकोटाले जेठ २३ गते साँझ बलात्कार गरेको भन्दै पीडित पक्षले जेठ २४ गते जिल्ला प्रहरी कार्यालय जुम्लामा उजुरी दिनु भएको थियो । प्रहरीमा उजुरी दिएपनि आर्थिक अवस्था कमजोर रहेकी पीडितलाई जिल्ला सदरमुकाममा कानुनी प्रक्रियामा जान आउन समस्या भएको थियो । पीडित बालिकालाई इन्सेक जिल्ला प्रतिनिधि मानदत्त रावलले १० हजार रुपियाँ नगद हस्तान्तरण गर्नु भएको हो ।

जिल्ला प्रहरी कार्यालय, जुम्लाका डीएसपी नरेन्द्र चन्दका अनुसार घटना अनुसन्धनको क्रममा रहेको छ । जाहेरी सरकारी वकिल कार्यालयमा पुगेको छ । घटनाका आरोपित गिरफ्तार भएपनि असार १९ गते तारेखमा छोडिएको छ । थप प्रमाण पुगेपछि कारवाही प्रक्रिया अगाडी बढाउने छौँ ।

पीडितको जेठ २४ गते कर्णाली स्वास्थ्य विज्ञान प्रतिष्ठान शिक्षण अस्पताल, जुम्लामा स्वास्थ्य परीक्षण भएको जिल्ला प्रहरी कार्यालय, जुम्लाले जनाएको छ ।


मानदत्त रावल