समाचारहरू

१५ वर्षीया बालिकालाई सामूहिक बलात्कार गरेको आरोपमा प्रहरीले पुस २५ गते चार जनालाई  गठ्ठाघरबाट गिरफ्तार गरेको छ ।

गिरफ्तार पर्नेमा उदयपुर जिल्ला घर भई हाल गठ्ठाघर डेरा गरी बस्ने २५ वर्षीय शिवजी भन्ने रिपुमर्दन बस्नेत, सोही ठाउँ बस्ने १८ वर्षीय सुशान्त खड्का, १८ वर्षीय सुशील कार्की र रौतहट चन्द्रपुर नपा–१ घर भई हाल लोकन्थली बस्ने १८ वर्षीय प्रवेश बस्नेत रहेको महानगरीय प्रहरी परिसर भक्तपुरका डिएसपी रेवतीरमण पोखरेलले बताए ।

पीडित बालिकालाई पुस २४ गते दिउँसो चारैजनाले सामूहिक बलात्कार गरेको भन्दै पीडितका आफन्तले आरोपितहरू विरूद्ध पुस २५ गते महानगरीय प्रहरी परिसर भक्तपुरमा उजुरी दिएपछि सोही दिन राति करीब ८ बजे आरोपितहरूलाई गिरफ्तार गरी पुस २६ गते भक्तपुर जिल्ला अदालतमा जबरजस्ती करणी अद्योगमा मुद्दा चलाएको पोखरेलले बताए ।

पीडित बालिकाको स्वास्थ परीक्षण पुस २५ गते प्रसूति गृह थापाथली, काठमाडौँमा गरिएको प्रहरीले जनाएको छ ।

सविना केसी