समाचारहरू

६६ वर्षीया महिलालाई बलात्कार गरेको कसुरमा लिखु तामाकोसी गाउँपालिका-३ धोबी बिक टोलका ५० वर्षीय सिंहबहादुर कामीलाई प्रहरीले ०८० जेठ १ गते गिरफ्तार गरेको छ ।

प्रहरीले कामीलाई मन्थली नगरपालिका-१ मन्थली बजारबाट गिरफ्तार गरी जिल्ला अदालतमा बुझाएको र सोही दिन अदालतले सजाय भुक्तानका लागि जिल्ला कारागार कार्यालयमा पठाएको जिल्ला प्रहरी कार्यालय रामेछापका इन्स्पेक्टर राजुप्रसाद ढकालले जानकारी दिनु भयो ।

पीडित महिलालाई ०७८ पुस २३ गते राति पतिको शोकमा जुठो बारेर बसेको अवस्थामा बलात्कार गरेको आरोपमा कामीविरुद्ध पुस २५ गते जिल्ला प्रहरी कार्यालयमा उजुरी दर्ता भएको थियो ।

पीडितको स्वास्थ्य परीक्षण पुस २४ गते प्राथमिक स्वास्थ्य केन्द्र मन्थलीमा गरिएको थियो । कामीलाई प्रहरीले सोही दिन गिरफ्तार गरेको थियो ।

प्रहरीले जिल्ला अदालतमा ०७८ माघ १७ गते जबरजस्ती करणीको मुद्दा दर्ता गरेकोमा न्यायाधीश बद्रिप्रसाद ओलीको आदेशले आरोपितलाई पुर्पक्षका लागि १ लाख रुपियाँ धरौटी राखी सोही दिन तारेखमा रिहा गरेको थियो ।

न्यायाधीश इन्दिरा शर्माको इजलासले ०७९ भदौ ३० गते कामीविरूद्धको अभियोग दावी पुग्ने अन्तिम आदेश गर्दै तीन वर्ष पाँच महिना सात दिन कैद सजाय, १ लाख रुपियाँ जरिबाना र १५ हजार रुपियाँ पीडित राहत कोषमा भराउने फैसला गरेको थियो ।

कैद सजायको फैसलापछि कामीको खोजतलासका क्रममा ०८० जेठ १ गते गिरफ्तार भएको इन्सपेक्टर ढकालले बताउनु भयो ।

नवराज पथिक