समाचारहरू

१५ वर्षीया बालिकालाई डाक्नेश्वरी नगरपालिका–३ हटेलका २४ वर्षीय महेशकुमार साहले बलात्कार गरेको भन्दै इलाका प्रहरी कार्यालय कल्याणपुरले ०८० असोज ९ गते उजुरी दर्ता गरेको छ ।

पीडितकी आमाले दिएको उजुरी इलाका प्रहरी कार्यालय कल्याणपुरले दर्ता गरेको जनाएको छ । घरमा सुतिरहेकी बालिकालाई जबरजस्ती आफ्नो घरमा रहेको गुहालीमा ल्याएर असोज ३ गते राति बलात्कार गरेको पीडितले बताउनु भयो । पीडितको स्वास्थ्य परीक्षण असोज ८ गते गजेन्द्रनारायण सिंह अस्पताल राजविराजमा भएको छ ।

बलात्कार घटनाका आरोपितसँग क्षतिपूर्ति लिएर मिल्न दबाब दिने सोही वडाका ४८ वर्षीय चन्द्रशेखर साहलाई पनि विपक्षी बनाई उजुरी दिइएको छ । घटनापछि पीडित र उनको परिवारलाई चार दिनसम्म घरबाट बाहिर निक्लिन नदिएर चन्द्रशेखर साहले मेलमिलापका लागि लोभ र दवाव दिएको आरोप छ । आरोपितलाई कानुन अनुसार कारबाही हुनुपर्ने भन्दै पीडित र उनको परिवार असोज ८ गते इलाका प्रहरी कार्यालय कल्याणपुर गएर माँग गरेका थिए ।

घटनाका आरोपित दुबै जनाविरुद्ध उजुरी दर्ता भई कारबाही प्रक्रिया अगाडि बढाइएको जिल्ला प्रहरी कार्यालय सप्तरीका सूचना अधिकारी डिएसपी ढुण्डिराज नेउपानेले बताउनु भयो ।

मनोहरकुमार पोखरेल