बलात्कार घटनाका आरोपित विरुद्ध उजुरी दर्ता

 

१५ वर्षीया बालिकालाई बलात्कार गरेको आरोपमा पीडित पक्षले निजगढ नगरपालिका–२ का वडा अध्यक्ष ३५ वर्षीय राजु भनिने राजन श्रेष्ठ बिरुद्ध इलाका प्रहरी कार्यालय निजगढमा असोज २५ गते दिएको उजुरी दर्ता भएको छ ।

पीडित बालिकालाई आरोपित श्रेष्ठले असोज १९ गते दशैँको टिकाको दिन आरोपितको घरमा बलात्कार गरेको भन्दै पीडित बालिकाको आमाले इलाका प्रहरी कार्यालय निजगढमा असोज २५ गते उजुरी दिएकी थिइन् ।

विभिन्न प्रलोभन र डरत्राश देखाउँदै गत एक वर्षदेखि आरोपित श्रेष्ठले अमर्यादित कार्य गर्दै आएको पीडित बालिकाले बताउनु भयो ।

असोज २४ गते पीडितका आफन्त र आरोपित बिच घटनाका बारेमा छलफल हँुदा आरोपित श्रेष्ठले घटना लुकाउन अनुरोध गरेपछि पीडित पक्षले हातपात गर्न लाग्दा आरोपित छलफलबाट भागेको पीडितकी आमाले बताउनु भयो ।

पीडितकी आमाले दिएको उजुरी र पीडितको बयान साथै स्वास्थ्य परीक्षण प्रतिवेदनका आधार कारबाही प्रक्रिया अगाडि बढाएको इलाका प्रहरी कार्यालय निजगढका इन्स्पेक्टर सन्जीव ओलीले बताउनु भयो ।

पीडितको स्वास्थ्य परीक्षण असोज २५ गते निजगढ अस्पतालमा गरिएको छ । घटनापछि आरोपित श्रेष्ठ फरार रहेकाले खोजी कार्य भइरहेको इन्स्पेक्टर ओलीले जानकारी दिनु भयो ।


भोलानाथ पौडेल