समाचारहरू

१८ वर्षीया युवतीलाई बलात्कार गरेका आरोपित तिलाठी कोइलाडी गाउँपालिका–२ लौनियाका २० वर्षीय राजु मण्डल खंग खत्वे जेठ ४ गते गिरफ्तार भएका छन् ।

जिल्ला अदालतमा उपस्थित गराइएका आरोपितलाई जिल्ला न्यायाधीश हर्कबहादुर क्षेत्रीको आदेशमा पुर्पक्षका लागि राजविराज कारागारमा थुनामा पठाइएको अदालतले जनाएको छ ।

आरोपितले २०७८ असार १६ गते बलात्कार गरेको भन्दै पीडितका बुबाले ०७८ असार २४ गते जिल्ला प्रहरी कार्यालयमा उजुरी दिनुभएको थियो ।

पीडितको स्वास्थ्य परीक्षण असार २४ गते राजविराजस्थित गजेन्द्रनारायण सिंह अस्पतालमा भएको थियो ।

घाँस काट्न राजविराज नगरपालिका–१३ विषहरियास्थित खेत गएको अवस्थामा आरोपितले बलात्कार गरेको पीडितले बताउनु भयो । पीडितका अनुसार घटना बारे घरपरिवारमा भनिदिने बताएपछि विवाह गर्ने आश्वासन दिएका आरोपितले ०७८ असार १९ गते भारत बिहारको पटना पु¥याई असार २२ गतेसम्म राखेर पटक–पटक बलात्कार गरे । आरोपितका आमाले पठाएका गाउँकै टिसरा भनिने तिलेश्वर खंग र आरोपितले पटनाबाट गाउँ नजिकै सीमावर्ती कुनौली नाकामा ०७८ असार २३ गते ल्याएर युवतीलाई छाडेका थिए ।

आरोपित भारत बिहारको कर्जाइनस्थित मामाघरमा लुकेर बस्दै आएका थिए । फरार रहेको आरोपितविरुद्ध जिल्ला अदालतमा ०७९ असार १५ गते अभियोग पत्र दायर भएको थियो ।

मनोहरकुमार पोखरेल