बलात्कार घटनाका आरोपित गिरफ्तार

 

नौ वर्षीया बालिकालाई बलात्कार गरेको आरोपमा प्रहरीले कुश्मा नपा-९ कटुवाचौपारीका वडा सदस्य ६९ वर्षीय विष्णुहरि पराजुलीलाई साउन १४ गते गिरफ्तार गरेको छ ।

पीडित बालिकालाई आरोपितले साउन ९ गते बलात्कार गरेको र घटना गाउँमा नै मिलाउने प्रयास भएपछि पर्वतमा क्रियाशील मानव अधिकारकर्मी र प्रहरीको सहकार्यमा आरोपित एक सातापछि गिरफ्तार भएका हुन् ।

बलात्कार जस्तो जघन्य घटना गाउँमा नै मिलाउने प्रयास भइरहेको थाहा भएपछि इन्सेक प्रतिनिधि सन्तोष थापाले जिल्ला प्रहरी कार्यालय, पर्वतलाई घटनाको जानकारी गराई पीडित बालिकालाई न्याय दिलाउन मौखिक अनुरोध गरेका थिए ।

१ लाख रुपियाँ दिने शर्तमा मिलापत्र

जिल्ला प्रहरी कार्यालय, पर्वतका इन्स्पेक्टर राजन रायमाझीले जानकारीका आधारमा घटनाका आरोपितलाई गिरफ्तार गरी घटनाको बारेमा अनुसन्धान गरिरहेको बताए ।

आर्थिक अवस्था कमजोर रहेको पीडित पक्षका अनुसार आरोपित पराजुलीले सुरूमा १० हजार रुपियाँ दिने र घटनालाई बाहिर नल्याउने शर्त राखेको भएपछि पीडित पक्षको तर्फबाट केही व्यक्तिहरूले १ लाख रुपियाँको माग गरेपछि सो रकम दिने सहमति भएको थियो ।

आरोपित पक्षले साउन १६ गते मात्रै पैसा दिने सहमति गरेको पीडित पक्षको भनाई छ ।

स्वास्थ्य परीक्षण एक सातापछि

घटना लगत्तैदेखि बालिका बिरामी पर्दै गएपछि पीडित बालिकाकी आमासहित आरोपित पक्षका आफन्तहरूले बालिकालाई बागलुङ अस्पतालमा लगेर साउन १३ गते उपचार गराएका थिए ।

जिल्ला अस्पताल पर्वतमा साउन १४ गते पीडित बालिकाको पुनः स्वास्थ परीक्षण गरिएको जिल्ला प्रहरी कार्यालय, पर्वतका डिएसपी श्यामु अर्यालले जानकारी दिए ।


सन्तोष थापा