समाचारहरू

१३ वर्षीया बालिकालाई बलात्कार गरेको आरोपमा प्रहरीले भेरी नपा-४ का ३३ वर्षीय सविन चन्दलाई साउन १६ गते गिरफ्तार गरेको छ ।

आरोपितले साउन ७ र ८ गते पीडितलाई बलात्कार गरेको भन्दै पीडित पक्षले साउन ८ गते जिल्ला प्रहरी कार्यालयमा उजुरी दिएको थियो ।

त्यसैगरी सोही दिन १५ वर्षीया अर्की बालिकालाई भेरी नपा-४ का २७ वर्षीय रुपक चन्दले बलात्कार गरेको भन्दै पीडित पक्षले जिल्ला प्रहरी कार्यालयमा साउन ८ गते उजुरी दिएका थिए । आरोपित रुपक फरार रहेको र खोजी भइरहेको प्रहरीले जनाएको छ ।

मोवाइल, पैसा र घडी दिन्छु भन्दै सुरुमा फकाउँदै र पछि नमानेपछि मार्ने धम्की दिएर दुई दिनसम्म स्थानीय होटलमा राखेर बलात्कार गरेको पीडित पक्षले आरोप लगाएको छ ।

पीडित पक्षको उजुरीका आधारमा सविनलाई गिरफ्तार गरिएको जिल्ला प्रहरी कार्यालयका निमित्त प्रमुख इन्स्पेक्टर इन्द्रजीत सुनारले बताए ।

पीडित बालिकाका अभिभावकलाई बलात्कार घटनाविरूद्ध मुद्दा नचलाउन स्थानीय नेता, केही जनप्रतिनिधि र केही पहुँचवाला व्यक्तिहरूले दबाब दिइरहेको पीडित पक्षले आरोप लगाएका छन् ।

पीडितका अभिभावकहरूले आफूलाई चारैतिरबाट मुद्दा नदिन र मिलापत्र गर्न दबाब आइरहेको बताउँदै न्यायका लागि कसैले सहयोग नगरेको गुनासो गरेका छन् । पीडित दुवैको स्वास्थ्य परीक्षण जिल्ला अस्पताल जाजरकोटमा साउन ९ गते गरिएको प्रहरीले जनाएको छ ।

दिनेशकुमार श्रेष्ठ