बलात्कार घटनाका आरोपित गिरफ्तार

  ०७९ असार २ गते

१३ वर्षीया बालिकालाई बलात्कार गरेको आरोपमा इलाका प्रहरी कार्यालय कञ्चनरूपले असार २ गते तिलाठी कोइलाडी गाउँपालिका–८ सडेपारका २२ वर्षीय ट्रक चालक रङ्गिला भनिने लडुलाल मण्डललाई गिरफ्तार गरेको छ ।

हनुमाननगर कङ्कालिनी नगरपालिका–१ स्थित कोशी व्यारेजमा ट्रकबाट बालिकालाई उतारेर यही वैशाख ४ गते आरोपितले बलात्कार गरेको पीडितकी हजुरआमाको आरोप छ ।

ट्रक चढाएर सुनसान ठाउँमा रोकी पीडित बालिकालाई डरधाक धम्की दिई आरोपितले तीन दिनसम्म सँगै राखेर पटक–पटक बलात्कार गरेको र वैशाख ७ गते साँझ खाँडो नदी पुलमा अलपत्र छाडी ‘फरार’ भएको पीडितले बताइन् ।

जिल्ला प्रहरी कार्यालय सप्तरीमा वैशाख ८ गते उजुरी दिएपछि पीडित बालिकाको स्वास्थ्य परीक्षण गजेन्द्रनारायण सिंह अस्पताल राजविराजमा गरिएको पीडितकी हजुरआमाले बताइन् ।

जिल्ला प्रहरीले दुवै पक्षलाई राखी छलफल गराएको र धेरैपछि कारवाहीका लागि कञ्चनरूप प्रहरी कार्यालयमा पठाएको पीडितका परिवारको भनाइ छ ।

इलाका प्रहरी कार्यालय कञ्चनरूपमा उजुरी आएपछि जेठ १५ गते उजुरी दर्ता गरेर खोजी गर्दा आरोपित समेत गिरफ्तार भएको डिएसपी रामकुमार यादवले बताउनु भयो ।


मनोहरकुमार पोखरेल