समाचारहरू

१८ वर्षीया युवतीलाई बलात्कार गरेको आरोपमा प्रहरीले मानेभञ्ज्याङ्ग गाउँपालिका–५ धिम्लेका २७ वर्षीय टङ्कराज राई(रिदम) लाई जेठ ८ गते गिरफ्तार गरेको छ ।

पीडित युवतीलाई आरोपितले जेठ ८ गते बलात्कार गरी मरणासन्न हुने गरी कुटपिट गरेको गिरफ्तारपछि अनुसन्धानका क्रममा खुलेको डिएसपी सुकदेव खनालले इन्सेक प्रतिनिधिसँगको फोन सम्पर्कमा बताउनु भयो ।

जेठ ७ गते राति घरमा सुतेकी पीडित जेठ ८ गते घर नजिकैको खोल्सामा अर्धचेत अवस्थामा फेला परेपछि उद्दार गरी ओखलढुङ्गा सामुदायिक अस्पतालमा उपचारका लागि भर्ना गरिएको थियो ।

सामुदायिक अस्पतालमा उपचार हुन नसकेपछि थप उपचारका लागि काडमाण्डौँ लगिएको छ ।

घटनालगत्तै काठमाण्डौँतर्फ भाग्दै गरेका आरोपितलाई सिन्धुली प्रहरीको सहयोगमा खुर्कोटबाट गिरफ्तार गरेको डिएसपी खनालले बताउनु भयो ।

बलात्कारपछि पोल खुल्ने डरले पीडितलाई आरोपितले कुटपिट गरेको प्रहरीको भनाइ छ ।

सरस्वती बानिया