बलात्कार घटनाका आरोपित गिरफ्तार

  ०७९ वैशाख २५ गते

१२ वर्षीया बालिकालाई वैशाख २३ गते बलात्कार गरेको आरोपमा प्रहरीले जितपुर सिमरा उपमहानगरपालिका–१ पथलैया दशधुरे टोल कमिटीका अध्यक्ष तथा दक्षिणकाली मन्दिरका पुजारी ५० वर्षीय मानबहादुर लामा, बालिकाको ५० वर्षीय नातेदार र १६ वर्षीय दुई जना बालकलाई घटना स्थलबाट सोही दिन गिरफ्तार गरेको छ ।

चार जनाले सामूहिक बलात्कार गर्दा बालिकाले गुहार मागेको एक बालकले सुनेपछि गाउँमा जानकारी गराएका थिए । बालकले जानकारी गराएपछि छिमेकीहरूले बालिकालाई बचाउने क्रममा आरोपितलाई कुटपिटसमेत गरेका थिए ।

छिमेकीले घटनाका विषयमा जानकारी गराएकाले इलाका प्रहरी कार्यालय, सिमराको प्रहरीले पीडित र आरोपितलाई अल्पाइन अस्पताल सिमरामा उपचार गराएको छ ।

पीडितको स्वास्थ्य परीक्षण कलैया अस्पतालमा सोही दिन गरिएको इलाका प्रहरी कार्यालय सिमराका इन्स्पेक्टर राजकिशोर साहले बताउनु भयो ।

सामूहिक बलात्कार गरेको आरोपमा इलाका प्रहरी कार्यालयमा वैशाख २५ गते उजुरी दिएको पीडित परिवारले जनाएको छ ।


भोलानाथ पौडेल