बलात्कार घटनाका आरोपित गिरफ्तार

  ०७८ माघ ९ गते

२२ वर्षीया महिलालाई बलात्कार गरेको र १९ बर्षीया महिलालाई बलात्कार प्रयास गरेको आरोपमा प्रहरीले लुम्बिनी सांस्कृतिक नपा–९ पिपरहवाका २६ वर्षीय सुभाष यादव र सोही ठाउँका २१ वर्षीय गणेश यादवलाई माघ ७ गते घटनास्थलबाटै गिरफ्तार गरेको छ ।

पीडितद्वयलाई आरोपितले माघ ७ गते भैरहवा जाने भन्दै गाडीमा बसालेको र बाटोमा पुगेर अलिकति पराल लग्नुछ भनी खेततिर लगेर एक जनालाई बलात्कार गरेको र अर्की महिलालाई बलात्कार प्रयास गरेकाले पीडितले प्रहरीलाई खबर गरेपछि घटनास्थलबाटै पीडितको उद्दार र आरोपितलाई गिरफ्तार गरेको थियो ।

पीडितले आरोपितविरुद्ध माघ ८ गते इलाका प्रहरी कार्यालय लुम्बिनीमा जबरजस्ती करणीसम्बन्धी कसुरमा उजुरी दिएका छन् ।

पीडित पक्षले दिएको उजुरीका आधारमा कारवाही अगाडि बढाएको इलाका प्रहरी कार्यालय लुम्बिनीका इन्स्पेक्टर इश्वर कार्कीले फोनमार्फत इन्सेक प्रतिनिधिलाई जानकारी दिनु भयो ।

पीडितद्वयको स्वास्थ्य परीक्षण माघ ७ गते राती नै लुम्बिनी प्रादेशिक अस्पताल बुटवलमा गरिएको छ ।


रीमा बिसी