बलात्कार घटनाका आरोपित गिरफ्तार

  ०७८ असार २२ गते

१९ वर्षीया युवतीलाई सामूहिक बलात्कार गरेको आरोपमा प्रहरीले रुपनी गाउँपालिका–६ वीरेन्द्र बजारका २५ वर्षीय छोटु भनिने देवनारायण मण्डललाई असार १९ गते गिरफ्तार गरेको छ ।

गिरफ्तार आरोपित मण्डललाई जिल्ला न्यायाधीश इश्वरमणी ओझाको इजलासले सोही दिन पुर्पक्षका लागि राजविराज कारागारमा थुनामा पठाएको छ ।

सामूहिक बलात्कारको घटनामा घटनालगत्तै ०७६ जेठ ५ गते गिरफ्तारीमा परेका रुपनी गाउँपालिका–६ वीरेन्द्र बजारका २० वर्षीय मुन्ना मण्डल भनिने वेदप्रकाश मण्डल जिल्ला अदालतको ०७७ पुस १२ गतेको आदेशले सात वर्ष कैद सजायको फैसला गरेको थियो ।

हाल वेदप्रकाश जिल्ला कारागारमा कैद भुक्तान गरिरहेका छन् । आरोपित देवनारायणसहित ६ जना विरुद्धको मुद्दा मुल्तवीमा राख्ने फैसला गरेको थियो ।

घटनापछि गिरफ्तार वेदप्रकाशले बयान दिएअनुसार नै आरोपितहरू देवनारायणसहित रुपनी गाउँपालका–६ वीरेन्द्र बजारका ३७ वर्षीय दिलिपकुमार खंग, २० वर्षीय पुकपुक भनिने सुमित मण्डल, २० वर्षीय विद्यानन्द सरदार, २८ वर्षीय आनन्द सरदार र २८ वर्षीय ओमप्रकाश मण्डलको पहिचान भएको हो ।

पीडितका अनुसार रुपनी गाउँपालिका–६ स्थित परीक्षा केन्द्र रहेको तेरहौता उच्च माविमा ०७६ जेठ ४ गते साँझ कञ्चनरुप नपा–११ ठेलियाका केटा साथीले बोलाएर गएको बेला आएका आरोपितहरूले साथीलाई कुटपिट गरी सामूहिक बलात्कार गरेका थिए । पीडित कक्षा ११ को परीक्षा दिन आफन्तको घर आएकी थिइन् ।

पीडितले जिल्ला प्रहरी कार्यालयमा ०७६ जेठ ५ गते उजुरी दिएपछि सोही दिन पीडितको स्वास्थ्य परीक्षण राजविराजस्थित गजेन्द्रनारायण सिंह अस्पतालमा गरिएको थियो ।


मनोहरकुमार पोखरेल