समाचारहरू

१४ वर्षीया बालिकालाई बलात्कार गरेको आरोपमा प्रहरीले सुवाघाट गङ्गामाला नपा-१० का १८ वर्षीय सुनिल मल्ललाई भदौ २० गते गिरफ्तार गरेको छ ।

बलात्कारका कारण रहेको गर्भपतनमा सहयोग गरेको आरोपमा आरोपित मल्लका ४६ वर्षीय बावु दानबहादुर मल्ललाई पनि प्रहरीले गिरफ्तार गरेको छ ।

पीडित बालिकालाई आरोपित सुनिलले गत वैशाख १६ गते बलात्कार गरेको आरोप छ । बलात्कारपछि बालिकाको गर्भ रहेको थाहा पाएर भदौ १६ गते सुनिलका बुबा दानबहादुर मल्लले वीरेन्द्रनगरमा ल्याएर गर्भपतन गराएको प्रहरीले जनाएको छ ।

बलात्कार घटनालाई लुकाएकी पीडित बालिकाले गर्भपतन गराएपछि मात्रै उक्त घटनाबारे अभिभावकलाई बताएको प्रहरीले जनाएको छ ।

अभिभावकले भदौ १९ गते इलाका प्रहरी कार्यालय छिञ्चुमा ठाडो उजुरी दिएपछि घटनाको अनुसन्धान थालिएको इलाका प्रहरी कार्यालयका इन्स्पेक्टर जयसिंह विष्टले जानकारी दिए ।

पीडित बालिकाको स्वास्थ्य परीक्षण मेहलकुना अस्पताल सुर्खेतमा भदौ १९ गते नै गरिएको प्रहरीले जनाएको छ ।

जिल्ला प्रहरी कार्यालयका डिएसपी बहादुरजङ्ग मल्लले बालिकाको गर्भपतन गराउने स्वास्थ्य संस्थाको पहिचान गरी कारबाही गर्ने प्रतिबद्धतासमेत जनाएका छन् ।

दुर्गा थापा