बलात्कार घटनाका आरोपित गिरफ्तार

  ०७३ भदौ २० गते

एक १० वर्षीया बालिकालाई बलात्कार गरेको आरोपमा १५ वर्षीय बालकलाई भदौ १८ गते प्रहरीले गिरफ्तार गरेको छ ।

पीडित बालिकालाई भदौ १८ गते साँझ आरोपित बालकले बलात्कार गरेको कुरा उपचारको क्रममा बालिकाले बताएपछि आरोपितलाई गिरफ्तार गरिएको जिल्ला प्रहरी कार्यालयका डिएसपी विरेन्द्र थापाले जानकारी दिए ।

बलात्कारका कारण गम्भीर घाइते भएकी पीडित बालिकाको उपचार तनहुँ जिल्लाको आवुँखैरेनीस्थित छिम्केश्वरी मेडिकलमा लगिएको थियो । उक्त मेडिकलमा उपचार गर्ने क्रममा बालिका बलात्कारका कारण घाइते भएको प्रहरीले थाहा पाएपछि पीडित बालिकालाई जिल्ला अस्पताल गोरखामा स्वास्थ्य परीक्षण र उपचारका लागि ल्याइएको थियो ।

जिल्ला अस्पतालमा सामन्य उपचारपछि थप उपचारका लागि भदौ १९ गते काठमाडौँ रिफर गरिएको अस्पताल प्रशासनले जनाएको छ । पीडित बालिकाको स्वास्थ्य परीक्षण भदौ १९ गते जिल्ला अस्पताल गोरखामा गरिएको प्रहरीले जनाएको छ ।

पीडितको पक्षबाट भदौ २० गते दिउँसो यो समाचार तयार पार्दासम्म प्रहरीमा उजुरी प्राप्त नभएको पनि प्रहरीले जनाएको छ ।

'घटनाको सम्वन्धमा थप अनुसन्धान भइरहेको छ ।'-डिएसपी थापाले भने-'बालकलाई भदौ १९ गते मुलुकी ऐन जबरजस्ती करणी तथा हाडनाता करणीको महल अनुसार मुद्दा दर्ता गरी बालबालिका सम्वन्धी ऐन-२०४८ अनुसार अनुसन्धान प्रक्रिया अगाडि बढाएका छौँ ।'


हरिराम उप्रेती