समाचारहरू

१२ वर्षीया बालिकालाई बलात्कार गरेको आरोपमा प्रहरीले षडानन्द नगरपालिका-७ केउरेनीपानीका ३२ वर्षीय मेघराज श्रेष्ठलाई साउन २१ गते गिरफ्तार गरेको छ ।

पीडित बालिकालाई आरोपितले साउन १४ गते बलात्कार गरेको घटनामा षडानन्दा नगरपालिकाका मेयर विरवल राईसहित बसेर ६० हजार रुपियाँ पीडित बालिकालाई दिएर गाउँमै मिलाइएको बताइएको छ । सुरुमा बलात्कार गरेको नभइ बलात्कार प्रयासको घटना भनी गाउँमै मिलाइएको पीडित पक्षको भनाइ छ । तर, पीडित बालिकाको स्वास्थ्यमा समस्या आएपछि खाँदबारी जिल्ला अस्पताल लगिएको थियो ।

पीडित बालिकाको परिवारमा कुरा मिलेर घटना लुकाइए पनि ठूली आमाले बालिकालाई खाँदबारी उपचारको लागि लगेकी थिइन् । 'मेयरसहित बसेर घटना मिलाएका थिए । तर, खाँदबारीको जिल्ला अस्पतालमा बालिकालाई लगेर परीक्षण गर्दा बलात्कार गरेको खुलेपछि प्रहरीमा उजुरी दिएको हौँ ।'-पीडित बालिकाकी ठूली आमाले भनिन् ।

किरण राई