बलात्कार घटनाका आरोपितविरूद्ध उजुरी

 

१० वर्षीया बालिकालाई बलात्कार गरेको आरोपमा आठराई गाउँपालिका-२ खाम्लालुङका ५६ वर्षीय चक्रबहादुर फोम्बोविरूद्ध पीडित पक्षले साउन ९ गते इलाका प्रहरी कार्यालय आठराई सङ्क्रान्तीमा उजुरी दिएका छन् ।

पीडित बालिकालाई आरोपितले साउन ५ गते बलात्कार गरेको र कसैलाई भने मारी दिने धम्की दिएको पीडित पक्षले प्रहरीमा दिएको उजुरीमा उल्लेख छ ।

बलात्कारको घटना गाँउमै मिलाउन लागेको अवस्थामा महिला अधिकार मञ्च खाम्लालुङका सदस्यहरूको सहयोगमा पीडित पक्षले प्रहरीमा उजुरी दिएको जिल्ला प्रहरी कार्यालयका डिएसपी राजन भुजेलले बताए ।

सदरमुकाम म्याङलुङ्बाट ६३ किलो मिटर टाढा आठराई सङ्क्रान्तीमा उजुरी परेकाले पीडित बालिकालाई जिल्ला अस्पतालमा ल्याएर स्वास्थ्य परीक्षण गर्न अझै २ दिन लाग्ने डिएसपी भुजेलले बताए । फरार आरोपितलाई हुलियाको आधारमा खोजी थालिएको डिएसपी भुजेलले बताए ।


भगिश्वर लिम्बू