बलात्कार घटनाका आरोपितविरूद्ध प्रहरीमा उजुरी

 

१४ वर्षीया बालिका आफन्तबाटै बलात्कार भएर पेटमा ६ महिनाको गर्भ रहेपछि पीडितकी आमाले जेठ १४ गते जिल्ला प्रहरी कार्यालय इलाममा आरोपितविरूद्ध उजुरी दिएकी छन् ।

नाताले मामा, काकाका छोरा दाजु र फुपूका छोराहरूबाट पटकपटक बलात्कार भएको थाह भएपछि उनीहरू विरूद्ध उजुरी दिएको पीडित बालिकाकी आमाले बताइन् । आरोपितहरूलाई गिरफ्तार गरेर अनुसन्धान गरिने प्रहरीले जनाएको छ ।

कक्षा ६ मा पढ्दै गर्दा छारे रोगले सताएपछि विद्यालय जान छाडेकी बालिकालाई घरमा कोही नभएको मौका छोपी आफन्तहरूले मोवाइल चार्ज गर्ने बहाना बनाउँदै आएर बलात्कार गर्ने गरेको पीडितकी आमाले आरोप लगाएकी छन् । छोरीलाई लागेको छारे रोगको उपचार गर्न अस्पताल लाँदामात्रै पिसाब जाँच गर्ने क्रममा गर्भ देखिएपछि मात्र उनी बलात्कार भएको परिवारले जानकारी पाएको थियो ।

पीडित बालिकाका अनुसार आफू नौ वर्षको हुँदा देखि नाताले मामा पर्ने व्यक्तिले बलात्कार गर्ने गरेका थिए । अन्यले पनि पटकपटक घरमै आएर बलात्कार गर्ने गरेका थिए । अहिले ६ महिनाको गर्भ रहेपछि बालिकालाई अब के गर्ने भन्ने विषयमा डक्टरमै भर परेको प्रमुख जिल्ला अधिकारी तथा जिल्ला बाल कल्याण समितिका अध्यक्ष श्रवणकुमार तिम्सिनाले बताए ।

समितिको जेठ १४ गते बैठक बसेर बालिकाको स्वास्थ्य अवस्थालाई ध्यान दिँदै डाक्टरको सल्लाह अनुसारनै उनको उपचारको व्यवस्था मिलाउनु पर्ने अवस्था रहेको प्रजिअ तिम्सिनाको भनाई छ ।


कोकिला ढकाल