समाचारहरू

२० वर्षीया महिलालाई बलात्कार गरेको आरोपमा गौशाला नगरपालिका-१० थापा गाउँका २५ वर्षीय अनुरुध महतोविरुद्ध ०८१ जेठ २१ गते पीडित पक्षले इलाका प्रहरी कार्यालय गौशालामा उजुरी दिनु भएको छ ।

आरोपितले जेठ ८ गते काम छ भनी पीडितलाई घरबाट बोलाई आफ्नो मोटरसाइकलमा बसाइ घर नजिकै रहेको क्रसर मिलमा लगी प्रलोभन तथा डर त्रास देखाइ बलात्कार गरेको पीडितका पतिले बताए ।

घटनालाई गाउँमै मिलाउन खोजिएको थियो । तर, गाउँमा नमिलेपछि जेठ २१ गते पीडित पक्षले आरोपितविरुद्ध इलाका प्रहरी कार्यालयमा उजुरी दिएको इलाका प्रहरी कार्यालय गौशालाका इन्स्पेक्टर सुर्य बहादुर रानामगरले जानकारी दिनु भयो । उजुरीपश्चात आरोपितको खोजतलास र घटनाबारे थप अनुसन्धान भइरहेको इन्स्पेक्टर रानामगरले बताउनु भयो ।

पीडितको स्वास्थ्य परीक्षण जेठ २२ गते प्रादेशिक अस्पताल जलेश्वरमा भयो ।

ममता विश्वकर्मा