बलात्कार घटनाका आरोपितविरुद्धको मुद्दा मुल्तबीमा राख्ने फैसला

  ०७९ असार २४ गते

१३ वर्षीया बालिकालाई बलात्कार गरेको आरोपमा बोदे बर्साइन नगरपालिका–५ जाँजरका २५ वर्षीय फिदा हुसेन भनिने हाफिज फिदा हुसेनविरुद्धको मुद्दा सप्तरी जिल्ला अदालतले असार २३ गते मुल्तबीमा राख्ने फैसला गरेको छ ।

न्यायाधीश प्रेमप्रसाद न्यौपानेको इजलासले ‘फरार’ रहेका आरोपितविरुद्धको मुद्दा मुल्तबीमा राख्ने फैसला गरेको अदालतले जानकारी दिएको छ ।

पीडित बालिकालाई आरोपित हुसेनले ०७७ साउन २३ गते बलात्कार गरेको भन्दै पीडितकी आमाले इलाका प्रहरी कार्यालय कडरबोनामा ०७७ भदौ ५ गते उजुरी दिएकी थिइन् ।

पीडित बालिकाको स्वास्थ्य परीक्षण गजेन्द्र नारायण सिंह अस्पताल राजविराजमा भदौ ७ गते गरिएको थियो ।

ट्युशन पढाउने आरोपितले आफ्नो घरमा बोलाएर दुई पटक बलात्कार गरेको र पछि आफ्नै घरमा आएर बलात्कार गरेको पीडितले बताएकी छन् ।

घटनास्थलबाट नियन्त्रणमा परेका आरोपितसँग भएको छलफलमा कुरा नमिलेपछि ढिलो गरी आएको उजुरी इलाका प्रहरी कार्यालयले भदौ ७ गते दर्ता गरेको थियो ।

जिल्ला अदालतबाट आरोपितविरुद्ध ०७७ भदौ ९ गते पक्राउ पुर्जी जारी भए पनि आरोपित गिरफ्तार नभएपछि ०७८ साउन ३२ गते अदालतमा प्रहरीले जिल्ला सरकारी वकिल कार्यालयमार्फत अभियोजन पत्र दायर गरेको थियो ।


मनोहरकुमार पोखरेल