बलात्कार घटनाका आरोपितलाई प्रहरीले आश्रय दिएको पीडितको आरोप

  ०८० कात्तिक १ गते

बलात्कार घटनामा पीडित ४७ वर्षीया महिलाले प्रहरीले बलात्कार घटनाका आरोपितलाई आश्रय दिएको आरोप लगाउनु भएको छ ।

इलाम नगरपालिका-३ का बलात्कार घटनाका आरोपित ३० वर्षीय सङ्गेश लिम्बूलाई प्रहरीले आश्रय दिएको पीडितको आरोप छ ।

पीडितले ०८० असोज ३० गते पत्रकार सम्मेलन गरी बलात्कार घटनाका आरोपित सङ्गेशविरूद्ध भदौ २६ गते प्रहरीमा उजुरी दिँदा प्रहरीले उजुरी नलिएको पीडितको आरोप छ ।

सङ्गेशले आफूलाई ०८० भदौ २३ गते बलात्कार गरेको र बलात्कार घटनाका आरोपितविरूद्ध भदौ २६ गते जिल्ला प्रहरी कार्यालयमा उजुरी दिँदा प्रहरीले उजुरी दर्ता नगरेको पीडितले पत्रकार सम्मेलनमा बताउनु भयो । उहाँले भन्नुभयो- प्रहरीले बलात्कार गर्नेलाई आश्रय दिएको छ, मैले प्रहरीमा बलात्कार शीर्षकमा दिएको उजुरी दर्ता नगरी फरक व्यहोरामा बल्लबल्ल प्रहरीले उजुरी दर्ता गरेको छ ।

आफूले प्रहरीमा दिएको उजुरी प्रहरीले दर्ता नगरेको, सो उजुरी माग्दा प्रहरीले उजुरी नदिएको र प्रहरीले लेखेको उजुरीका आधारमा अदालतले आरोपितविरूद्ध अनुसन्धानका लागि म्याद नथपेको पीडितले पत्रकार सम्मेलनमा बताउनु भयो । आरोपितविरूद्ध अदालतमा म्याद थप भएन, उल्टै आरोपितले घटना बाहिर ल्याए मार्ने धम्की दिएको छ, प्रहरीले आरोपितलाई संरक्षण गरेको छ, पीडितले पत्रकार सम्मेलनमा भन्नुभयो ।

बलात्कारजस्तो सम्वेदनशील विषयमा उजुरी लिएर जाँदा पीडित महिलाले प्रहरीको दमन खेप्नु परेको देउमाई नगरपालिका-३ का वडासदस्य चन्द्र राईले बताउनु भयो ।

पीडितले आरोपितविरूद्ध प्रहरीमा दिएको उजुरीका आधारमा आरोपितलाई भदौ २६ गते गिरफ्तार गरेको भएपनि अदालतले सो मुद्दामा म्याद नगरेपछि आरोपितलाई छाडिएको जिल्ला प्रहरी कार्यालयका डिएसपी वासुदेव खतिवडाले बताउनु भयो । उहाँले पीडितले भनेजस्तो नभई प्रहरीले घटनाका विषयमा अनुसन्धान गरिरहेको बताउनु भयो ।

पीडितले पत्रकार सम्मेलन गरी अधिकारकर्मी र पत्रकारको सहयोग मागेपछि प्रहरीले अनुसन्धानमा चासो नदेखाएको विषयले पत्रकार महासङघ, इलाम शाखाको ध्यानाकर्षण भएको महासङ्घका अध्यक्ष विप्लव भट्टराईले बताउनु भयो । उहाँले प्रहरीबाट पीडित अझ पीडित भएको घटनालाई पत्रकारहरूले सुक्ष्म ढङ्गले रिपोर्टिङ गरी पीडितलाई न्यायका लागि पहल गर्ने बताउनु भयो ।

पीडित महिलाको स्वास्थ्य परीक्षण जिल्ला अस्पतालमा भदौ ०८० भदौ २६ गते गरिएको छ ।


मनोज अधिकारी