समाचारहरू

शम्भुनाथ नगरपालिका–७ का ३५ वर्षीय दर्शन भनिने दशन मण्डललाई बालिका बलात्कार गरेको कसुरमा ०८० असोज १५ गते आठ वर्ष कैद सजाय भएको छ ।

जिल्ला न्यायाधीश हेमन्त रावलको इजलासले आरोपितलाई कसुरदार ठहर गर्दै आठ वर्ष कैदका साथै १ लाख रूपियाँ क्षतिपूर्ति भर्नुपर्ने फैसला भएको इजलास अधिकृत कुमार सुबेदीले बताउनु भयो ।

बलात्कार गरेको आरोपमा इलाका प्रहरी कार्यालय कल्याणपुरले आरोपित विरुद्ध ०७५ पुस २६ गते उजुरी दर्ता गरेको थियो । आरोपित मण्डल भारततर्फ फरार भएको र गिरफ्तार नभएको अवस्थामा अदालतले ०७६ असार ३० गते मुद्दा मुल्तबीमा राख्ने फैसला गरेको थियो ।

घटनाको साढे चार वर्षपछि आरोपित ०७९ चैत १ गते अदालतमा हाजिर भएपछि पुर्पक्षका लागि कारागारमा थुनामा परेका थिए । अदालतमा हाजिर भई निवेदन दिई मुल्तबीबाट मुद्दा जगाएका आरोपित जिल्ला न्यायाधीश हरिश्चन्द्र इङ्गनामको इजलासले पुर्पक्षका लागि थुनामा पुगेका हुन् ।

आरोपितले ०७५ साउन ५ गतेदेखि पटक–पटक बलात्कार गरेको भन्दै पीडितले अभिभावकलाई ०७५ पुस १६ गते बताउनु भएको थियो । बालिकाको पेट ठूलो हुँदै गएपछि चिकित्सक कहाँ चेकजाँच गर्दा गर्भवती भएको थाहा पाएपछि सोधपुछ गर्दा मात्र घटनाबारे जानकारी पाएको पीडितका अभिभावकले बताउनु भयो ।

बाख्रा चराउन जाने गरेकी बालिकालाई ललाईफकाई आरोपितले पटक–पटक बलात्कार गरेको भन्दै पीडितका बुबाले इलाका प्रहरी कार्यालय कडरबोनामा ०७५ पुस २६ गते उजुरी दिनुभएको थियो ।

पीडितको स्वास्थ्य परीक्षण राजविराजस्थित गजेन्द्रनारायण सिंह अस्पतालमा ०७५ पुस २६ गते भएको थियो । अस्पतालका चिकित्सकका अनुसार ०७५ पुस २७ गते भिडिओ एक्सरे गराउँदा पीडित बालिका २८ हप्ता तीन दिनकी गर्भवती थिइन् ।

मनोहरकुमार पोखरेल