समाचारहरू

१४ वर्षीया बालिकालाई बलात्कार गरेको कसुर ठहर गर्दै जिल्ला अदालतले व्यास नपा–१० विपीभन्ज्याङका २० वर्षीय यमबहादुर बिकलाई १८ वर्ष ६ महिना कैद सजायको फैसला गरेको छ । न्यायाधीश कोमलप्रसाद आचार्यको असार २४ गतेको इजलासले उक्त मुद्दामा दोषी ठहर गर्दै आरोपितलाई उक्त सजाय, ६ लाख रुपियाँ जरिबाना र १५ हजार क्षर्तीपुर्ति भराउने फैसला समेत गरेको जिल्ला अदालतका श्रेस्तेदार मिनबहादुर कुँवरले जानकारी दिनु भयो ।

पीडित बालिकालाई बिकले ०७७ मङ्सिर १५ गते बलात्कार गरेको र ०७८ जेठ १३ गते गर्भपतन गराएको भन्ने उजुरी परेपछि प्रहरीले बिकलाई ०७८ जेठ १४ गते गिरफ्तार गरेको थियो । पीडित बालिकालाई ०७७ मङ्सिर १५ गते र त्यसपछि पनि पटक–पटक बलात्कार गरेको तथा बलात्कारपछि रहेको गर्भलाई ०८७ जेठ १३ गते औषधि खुवाएर गर्भपतन गराएको आरोपमा प्रहरीले बिकलाई गिरफ्तार गरेको थियो ।

पीडित बालिकाको स्वास्थ्य परीक्षण ०७८ जेठ १४ गते दमौली अस्पतालमा गरिएको थियो । उक्त मुद्दामा सरकारी वकिल कार्यालयले ०७८ असार ८ गते मुद्दा दर्ता गरेकोमा आरोपित जिल्ला अदालतको आदेशाम असार ९ गतेदेखि पुर्पक्षका लागि जिल्ला कारागारमा थुनामा रहेका प्रहरीले जनाएको छ ।

प्रकाशचन्द्र भट्टराई