समाचारहरू

१७ वर्षीया बालिकालाई बलात्कार गरेको कसुरमा शम्भुनाथ नगरपालिका–४ सखुवाका २० वर्षीय दिपक सरदारलाई जेठ २६ गते १२ वर्ष कैद सजायको फैसला भएको छ ।

जिल्ला न्यायाधीश हेमन्त रावलको इजलासले आरोपितलाई ६ लाख रुपियाँ जरिवाना तिराउने र ५० हजार रुपियाँ क्षतिपूर्ति भराउने फैसला गरेको इजलास अधिकृत कुमार सुबेदीले बताउनु भयो । सुबेदीका अनुसार जरिवाना र क्षतिपूर्ति वापतको ६ लाख ५० हजार रुपियाँ पीडितलाई नै दिने फैसला समेत भएको छ ।

यस्तै फौजदारी कसुर पीडित राहत कोषमा आरोपितले १ हजार ८ सय रुपियाँ जम्मा गर्नुपर्ने फैसला भएको छ । जिल्ला अदालतमा हाजिर हुनासाथ सरदार ०७९ चैत २६ गतेदेखि राजविराज कारागारमा थुनामा छन् ।

आरोपितको वयानका आधारमा घटनामा सलंग्न रही फरार रहेका रुपनी गाउँपालिका–३ का १९ वर्षीय धर्मेन्द्र चौधरीको मुद्दा मुल्तबीमा राख्ने फैसला भएको छ । चौधरीविरुद्ध ०७९ जेठ ११ गते पक्राउ पुर्जी जारी भएको थियो । अदालतको आदेशमा ०७९ जेठ २५ गतेदेखि पुर्पक्षका लागि राजविराज कारागारमा थुनामा पुगेका रुपनी गाउँपालिका–३ सखुवाका २० वर्षीय सुरेश भनिने सुरैतलाल रामले भने सफाई पाएका छन् । सुरेश र अन्य तीन जना बालक ०७९ जेठ २ गते नै गिरफ्तार भएका थिए ।

शम्भुनाथ नगरपालिका–३ स्थित शम्भुनाथ मेला घुम्न गएका बेला आरोपितहरूले शम्भुनाथ मन्दिरदेखि सय मिटर पूर्व–दक्षिण तर्फ पानी टंकी छेउमा बलात्कार गरेको पीडितले बताउनु भयो । आरोपितहरूबाट सामूहिक बलात्कार भएको भन्दै पीडितका बुबाले जिल्ला प्रहरी कार्यालयमा ०७९ जेठ २ गते उजुरी दिनु भएको थियो । जिल्ला प्रहरी कार्यालयले जेठ ३ गते उजुरी दर्ता गरेको थियो ।

पीडितको स्वास्थ्य परीक्षण ०७९ जेठ ३ गते नै गजेन्द्रनारायण सिंह अस्पताल राजविराजमा भएको थियो ।

सप्तरी जिल्ला अदालतमा जेठ २३ गते अभियोगपत्र दायर भएको थियो । जिल्ला न्यायाधीश राजेन्द्रकुमार श्रेष्ठको आदेशमा ०७९ जेठ २५ गते सुरैतलाल पुर्पक्षका लागि राजविराज कारागारमा थुनामा र अन्य तीन जना बालक बालसुधार गृह वीरगञ्ज पठाइएको थियो । ती बालकहरू विरुद्धको मुद्दामा न्यायाधीश हेमन्त रावलको इजलासले ०८० जेठ २२ गते नै अभियोग दावीनपुग्ने फैसला गर्नुभएको थियो ।

मनोहरकुमार पोखरेल