समाचारहरू

१२ वर्षीया एक बालिकालाई बलात्कार गरेको आरोपमा पूर्पक्षका लागि थुनामा रहेका सुलुबुङ् गाविस-२ का २२ वर्षीय सुरेन भन्ने सुरेन्द्र राईलाई जिल्ला अदालतले १६ वर्षकैद सजायको फैसला सुनाएको छ ।

न्यायाधीश नवराज दाहालको इजलासले मुलुकी ऐन जबरजस्ती करणी महलको १, ३ (२) र ३ (क) नम्बर बमोजिम कसुर गरेको ठहर गर्दै सोही महलको ३ (२) बमोजिम आठ वर्षकैदको सजाय सुनाएको हो ।

भदौ १३ गते राईको मुद्दामाथि सुनुवाइ गर्दै दाहालको इजलासले सोही महलको ३ (क) अनुसार थप पाँच वर्ष र पीडित बालिकासँग नाता देखिएकाले सोही महलको २ नम्बर समेत कसुरमा हाडनाता करणी महलको २ को देहाय २ नम्बर बमोजिम तीन वर्षगरी १६ वर्षकैद सजाय सुनाएको छ । अदालतले राईलाई पीडितका नाममा ७५ हजार रुपियाँ क्षतिपूर्ति भराउने आदेश पनि दिएको अदालतका श्रेस्तेदार जगदीश्वर भट्टराईले जानकारी दिए ।

पीडित बालिकालाई ०७० साल यता पटक-पटक बलात्कार गर्दै आएको भन्दै राईविरूद्ध ०७२ फागुन १८ गते जिल्ला प्रहरी कार्यालयमा उजुरी परेको थियो । राईलाई फागुन १८ गते नै प्रहरीले गिरफ्तार गरेको थियो ।

कोकिला ढकाल