बलात्कार गरेको ठहरसहित १० वर्षकैदको फैसला

 

रिब्दीकोट गाउँपालिका-४ की चार वर्षीया बालिकालाई अप्राकृतिक मैथुन एवम् बलात्कार गरेको ठहरसहित जिल्ला अदालत पाल्पाले रुपन्देही जिल्लाको गैडहवा गाउँपालिका-४ घर भई रिब्दीकोट गाउँपालिका पाल्पामा ज्यालामजदुरी गर्दै आएका १९ वर्षीय शिवकुमार तिवारीलाई १० वर्षकैद र ५० हजार रुपियाँ जरिबानाको फैसला सुनाएको छ ।

असार २६ गते न्यायाधीश भरतमणी खनालको इजलासले उक्त फैसला सुनाएको जिल्ला अदालत पाल्पाका श्रेस्तेदार सुवर्ण खनालले बताए ।

गत जेठ ४ गते आरोपितले बालिकालाई बलात्कार गरेको भन्दै पीडित परिवारले जेठ ५ गते जिल्ला प्रहरी कार्यालयमा उजुरी दर्ता गराएको थियो । प्रहरीले सोही दिन नै तिवारीलाई गिरफ्तार गरी अनुसन्धान प्रक्रिया अगाडि बढाएको थियो ।


यज्ञमूर्ति तिमिल्सिना