बलात्कार गरेको कसूरमा सात वर्ष कैद फैसला

२० वर्षीया युवतीलाई बलात्कार गरेको कसूरमा नारायण नगरपालिका–६ काँडाचौरका २१ वर्षीय राहुल सार्कीलाई दैलेख जिल्ला अदालतले सात वर्ष कैद फैसला गरेको छ ।

जिल्ला न्यायाधीश बलराम लम्सालको चैत १२ गतेको इजलासबाट सात वर्ष कैद, पीडितलाई एक लाख क्षतिपूर्ति र पीडित राहत कोषमा १८ रुपियाँ तिनुपर्ने फैसला भएको दैलेख जिल्ला अदालतका सूचना अधिकारी टिकाराम न्यौपानेले जानकारी दिनुभयो ।

युवतीको डेरामा २०७८ मङ्सिर १७ गते राति आरोपितले बलात्कार गरेको भनी पीडित पक्षले मङ्सिर १८ गते दिएको उजुरीका आधारमा प्रहरीले उजुरी परेकै दिन गिरफ्तार गरी अनुसन्धान गरेको थियो ।

प्रहरीको अनुसन्धान प्रतिवेदनका आधारमा जिल्ला सरकारी वकील कार्यालय दैलेखले ०७८ पुस ४ गते दैलेख जिल्ला अदालतमा बलात्कार सम्बन्धी अभियोग पेश गरेको थियो ।

अभियोग सम्बन्धमा पुस ६ गते भएको थुनछेक बहसपछि तत्कालिन जिल्ला न्यायाधीश दण्डपाणी लामिछानेको इजलासबाट आरोपितलाई पुर्पक्षका लागि थुनामा राख्ने आदेश दिएको थियो ।
युवतीको स्वास्थ्य परीक्षण मङ्सिर १७ गते दैलेख अस्पतालमा गरिएको थियो ।


अमर सुनार