समाचारहरू

७० वर्षीया महिलालाई बलात्कार गरेको कसुरमा जिल्ला अदालतका न्यायाधीश स्वीकृति पराजुलीको इजलासले ०८० जेठ ९ गते गल्छी गाउँपालिका-५ का ५९ लप्टन भन्ने नेत्रबहादुर तामाङलाई ६ वर्ष कैद सजाय फैसला सुनाएको छ ।

पीडितलाई १ लाख रुपियाँ क्षतिपुर्ति र पीडित राहत कोषमा १ हजार २ सय रुपियाँ समेत भराउने फैसला भएको जिल्ला अदालतका श्रेस्तेदार खुम भण्डारीले जानकारी दिनुभयो ।

पीडित महिलालाई तामाङले ०७० चैत ३ गते जबरजस्ती करणी गरेको भनी सरकारी वकिल कार्यालय मार्फत जिल्ला अदालतमा ०७१ वैशाख ४ गते मुद्दा दर्ता भएको थियो ।

पीडित पक्षले उजुरी दिए पनि आरोपित फरार भएका कारण ०७१ मङ्सिर १० गतेबाट मुद्दालाई मुल्तबीमा राखिएको थियो ।

हरेक दुई वर्षमा मुल्तबीमा राखिएको मुद्दालाई अदालतले जगाउने गरेको छ । लामो समय मुल्तबीमा रहेको मुद्दाको जिल्ला अदालतले ०७९ फागुन १५ गते पुनः मुद्दा जगाएपछि फैसला भएको हो ।

घटनामा संलग्न कसुरदार तामाङ हाल पनि फरार छन् ।

सीताराम अधिकारी