बलात्कार गरेको कसुरमा १९ वर्ष कैदको फैसला

 

१३ वर्षीया बालिकालाई बलात्कार गरेको आरोपमा थुनामा रहेका बाबुलाई जिल्ला अदालत मकवानपुरले जेठ २१ गते १९ वर्ष कैदको फैसला गरेको छ ।

न्यायाधीश खडानन्द तिवारीको इजलासले कसुर ठहर गर्दै नाबालिकालाई बलात्कार गरेकोमा ९ वर्ष कैद र हाडनातामा करणी गरेकोमा १० वर्ष सहित १९ वर्ष कैद र पीडितलाई ७५ हजार रुपियाँ क्षतिपूर्ति उपलब्ध गराउने फैसला गरेको अदालतका श्रेष्तेदार आदर्श कौशिकले बताए ।

पीडित बालिकालाई आरोपितले ०७५ पुस २१ गते बलात्कार गरेको भन्दै पीडित पक्षले आरोपित विरूद्ध पुस २२ गते जिल्ला प्रहरी कार्यालय मकवानपुरमा उजुरी दिएको थियो ।

प्रहरीले आरोपितलाई पुस २३ गते गिरफ्तार गरेको थियो । पीडित बालिकाको स्वास्थ्य परीक्षण पुस २२ गते हेटौँडा अस्पतामा गरिएको थियो ।


पुष्पराज अधिकारी