समाचारहरू

१३ वर्षीया बालिकालाई बलात्कार गरेको कसुरमा जिल्ला अदालतले तुम्बेवा गाउँपालिका–५ का ३६ वर्षीय दिनेश राईलाई १९ वर्ष कैद सजाय फैसला गरेको छ ।

जिल्ला अदालतका न्यायाधीश टेकेन्द्र दाहालको माघ २० गतेको इजलासले कसुर गरेको ठहर गर्दै पीडितले पाउने गरी कसुरदारबाट १ लाख रुपियाँ क्षतिपूर्ति भराउन आदेश भएको अदालतका श्रेस्तेदार विश्वजङ्ग सिंजापतिले बताउनु भयो ।

पीडित बालिकालाई आरोपितले ०७८ पुस १७ गते बलात्कार गरेको आरोपमा पीडित पक्षले आरोपितविरुद्ध ०७८ चैत २ गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले ०७९ वैशाख ५ गते घरबाट गिरफ्तार गरी सोही दिन जिल्ला अदालतमा बलात्कार शीर्षकमा मुद्दा दर्ता गरी कारबाही अघि बढाएको थियो ।

जिल्ला अदालतका न्यायाधीश योगेन्द्रप्रसाद शाहको वैशाख ६ गतेको आदेशले आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा चैत २ गते गरिएको थियो ।

नौ वर्षीया बालीकालाई यौन दुर्व्यवहार गरेको कसुरमा जिल्ला अदालतले याङवरक गाउँपालिका–६ का ४८ वर्षीय जसशेर योङहाङलाई तीन महिना कैद सजाय फैसला गरेको छ ।

पीडित बालिकालाई ०७९ साउन ४ गते यौन दुर्व्यवहार  गरेको कसुरमा जिल्ला अदालतका न्यायाधीश टेकेन्द्र दाहालको माघ २० गतेको इजलासले कैद सजायसँगै २० हजार रुपियाँ जरिबाना र २५ हजार रुपियाँ पीडितले पाउने गरी क्षतिपूर्ति भराउन आदेश भएको अदालतका श्रेस्तेदार विश्वजंग सिजापतिले बताउनु भयो ।

बालिकालाई यौन दुर्व्यवहार गरेको आरोपमा पीडित पक्षले योङहाङविरूद्ध जिल्ला प्रहरी कार्यालयमा ०७९ साउन ५ गते उजुरी गरेको थियो ।

आरोपितलाई प्रहरीले सोही दिन गिरफ्तार गरी जिल्ला अदालतमा साउन २२ गते यौन दुर्व्यवहार शीर्षकमा मुद्दा दर्ता गरेको थियो ।

जिल्ला अदालतका न्यायाधीश योगेन्द्रप्रसाद शाहको साउन २२ गतेको इजलासले आरोपित पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा साउन ५ गते गरिएको थियो ।

सहमान विश्वकर्मा