समाचारहरू

१३ वर्षीया बालिकालाई बलात्कार गरेको कसुरमा जिल्ला अदालतका न्यायाधीश डिल्लीराम शर्मा अर्यालको इजलासले ०८० भदौ ३१ गते तनहुँको म्याग्दे गाउँपालिका-६ का २० वर्षीय कृष्ण मगरलाई १८ वर्ष कैद सजाय, ६ लाख रुपियाँ जरिबाना र ५० हजार रुपियाँ पीडितलाई क्षतिपुर्ति भराउने फैसला सुनाएको छ ।

पीडित बालिकालाई मगरले ०७७ चैत २४ गते इच्छाकामना गाउँपालिका-५, मुग्लिन स्थित होटलमा जन्मदिन मनाएर बलात्कार गरेको भन्दै पीडित पक्षले चैत २९ गते इलाका प्रहरी कार्यालय, मुग्लिनमा उजुरी दिएको थियो ।

पीडित बालिकाको स्वास्थ्य परीक्षण चैत २९ गते भरतपुर अस्पतालमा भयो । आरोपित सोही दिन घरबाटै गिरफ्तार भएका थिए । जिल्ला अदालतको आदेशले आरोपितलाई ०७८ साउन २८ गते पुर्पक्षका लागि थुनामा पठाएको थियो ।

अदालतका श्रेष्तेदार विष्णु आचार्यका अनुसार २२ औँ पेशीमा दुई वर्षपछि यो मुद्दाको फैसला भएको हो ।

दिपेन्द्र अधिकारी