बलात्कार गरेको कसुरमा १८ वर्ष कैद सजायको फैसला

  ०८० असार १ गते

१२ वर्षीया बालिकालाई बलात्कार गरेको कसुरमा जिल्ला अदालतले सिद्धिचरण नगरपालिका–३ का ८० वर्षीय फडिन्द्रप्रसाद दाहाल, सोही वडाका ३० वर्षीय डम्बरबहादुर भुजेल, ३७ वर्षीय केवल भुजेल र नारायणस्थान माध्यमिक विद्यालयका प्रधानाध्यापक सिद्धिचरण नगरपालिका–२ का ४४ वर्षीय पूर्णप्रसाद फुयाललाई १८ वर्षको कैद सजायको फैसला सुनाएको छ ।

जिल्ला अदालतका न्यायाधीश टीकाराम आचार्यको ०८० जेठ ३० गतेको इजलासले कसुर गरेको ठहर गर्दै कैद सजायसँगै जरिबाना र क्षतिपूर्ति भराउन आदेश भएको अदालतका श्रेस्तेदार नविन खनालले बताउनु भयो ।

फुयाललाई १ लाख ५० हजार रुपियाँ क्षतिपूर्ति र अन्य तीन जनालाई ५० हजार रुपियाँका दरले क्षतिपूर्ति भराउन आदेश भएको अदातका श्रेस्तेदार खनालले बताउनु भयो ।

पीडित बालिकालाई डम्बरबहादुर भुजेलले ०७९ जेठ १६ गते, केवल भुजेलले ०७९ वैशाख २७ गते, फडिन्द्रप्रसाद दाहालले ०७९ जेठ ६ गते र पूर्णप्रसाद फुयालले ०७९ जेठ २८ गते बलात्कार गरेको आरोपमा प्रहरीले सरकारी वकिलको कार्यालयमार्फत ०७९ असार २३ गते जिल्ला अदालतमा बलात्कार शीर्षकमा मुद्दा दर्ता गरेको थियो ।

कसुरदारमध्येका ८० वर्षीय पूर्णप्रसाद दाहालले ज्येष्ठ नागरिक ऐन अनुसार सजाय छुट माग गरेको भए पनि अन्य अभियुक्त सरह उनलाई पनि कैद सजाय तोकिएको छ ।

पीडित बालिकाको स्वास्थ्य परीक्षण जिल्ला अस्पतालमा ०७९ जेठ ३० गते गरिएको थियो ।


सरस्वती बानिया