बलात्कार गरेको कसुरमा १८ वर्ष कैद सजायको फैसला

  ०७९ चैत १२ गते

१५ वर्षीया बुहारीलाई बलात्कार गरेको कसुरमा जिल्ला अदालतले ऐसेलुखर्क गाउँपालिका जलेश्वरीका  ६० वर्षीय ससुरालाई १८ वर्ष कैद सजायको फैसला सुनाएको छ ।

जिल्ला अदालतका न्यायाधीश सुभाषबाबु पुरीको ०७९ चैत १२ गतेको इजलासले कसुर गरेको ठहर गर्दै कैद सजायको फैसला सुनाएको अदालतका श्रेस्तेदार रामकान्त यादवले बताउनु भयो ।

बुहारीलाई ०७८ भदौ १८ गते बलात्कार गरेको आरोपमा पीडित पक्षले आरोपितविरूद्ध ०७८ असोज ११ गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले असोज ११ गते गिरफ्तार गरी जिल्ला अदालतमा असोज २० गते बलात्कार शीर्षकमा मुद्दा दर्ता गरेको थियो । जिल्ला अदालतका न्यायाधीश सुभाषबाबु पुरीको असोज २० गतेको आदेशले आरोपित पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा ०७८ भदौ १८ गते गरिएको थियो ।


तारानाथ फुयल