बलात्कार गरेको कसुरमा १२ वर्ष कैद सजायको फैसला

  ०८० फागुन २४ गते

१३ वर्षीया बालिकालाई बलात्कार गरी गर्भवती बनाएको कसुरमा जिल्ला अदालतले माङ्सेबुङ गाउँपालिका-२ का ६९ वर्षीय दिलबहादुर बोखिम राईलाई १२ वर्ष कैद सजायको फैसला गरेको छ ।

जिल्ला अदालतका न्यायाधीश केशवप्रसाद घिमिरको ०८० फागुन २२ गतेको इजलासले कसुर गरेको ठहर गर्दै कैद सजायसँगै ५ लाख रुपियाँ जरिबाना र २० हजार रुपियाँ पीडित राहत कोषमा कसुरदारबाट भराउन आदेश भएको श्रेस्तेदार इन्द्रकुमार श्रेष्ठले बताउनु भयो ।

पीडित बालिकालाई ०७९ वैशाख १६ र जेठ २९ मा बलात्कार गरेको आरोपमा पीडित पक्षले आरोपितविरूद्ध जिल्ला प्रहरी कार्यालयमा ०७९ असार २९ गते उजुरी दिएको थियो ।

पीडित पक्षको उजुरीका आधारमा प्रहरीले आरोपितलाई ०७९ असार २९ गते गिरफ्तार गरी जिल्ला सरकारी वकिलको कार्यालयमार्फत जिल्ला अदालतमा ०७९ साउन १९ गते बलात्कार शीर्षकमा मुद्दा दर्ता गरेको थियो ।

जिल्ला अदालतको असार ३० गतेको आदेशमा आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा ०७९ असार २९ गते गरिएको थियो ।


मनोज अधिकारी