बलात्कार गरेको कसुरमा १२ वर्ष ६ महिना कैद सजायको फैसला

  ०७८ चैत १८ गते

पाँच वर्षीया बालिकलाई बलात्कार गरेको कसुर ठहर गर्दै जिल्ला अदालतले कल्याणपुर नपा–४ का ५७ वर्षीय अशेश्वर चमारलाई चैत १७ गते १२ वर्ष ६ महिना कैद सजायको फैसला सुनाएको छ ।

न्यायाधीश कृष्णप्रसाद सुवेदीको इजलासले सो फैसला गरेको हो । फैसलामा नेपाल सरकारसँग पीडितलाई ५० हजार क्षतीपुर्ति दिन भनिएको छ ।

पीडित बालिकालाई आरोपितले ०७६ फागुन २७ गते बलात्कार गरेको आरोपमा पीडित पक्षले इलाका प्रहरी कार्यालय मिर्चैयामा फागुन २८ गते उजुरी दिएको थियो ।

पीडित बालिकाको स्वास्थ्य परीक्षण जिल्ला अस्पताल सिरहामा फागुन २८ गते गरिएको थियो । इलाका प्रहरी कार्यालय मिर्चैयाले आरोपितलाई फागुन २८ गते गिरफ्तार गरेको थियो भने आरोपित जिल्ला अदालतको आदेशमा चैत ३० गतेदेखि पुर्पक्षका लागि थुनामा रहेको प्रहरीले जनायो ।


दुर्गा परियार