समाचारहरू

१४ वर्षीया एक बालिकालाई बलात्कार गरेको ठहर गर्दै चादे करन्जी गाविस-२ का २६ वर्षीय  सन्दिप खडकालाई जिल्ला अदालत सल्यानले माघ २५ गते ११ वर्षकैद र ५० हजार रुपियाँ क्षतिपूर्तिको फैसला सुनाएको छ ।

न्यायाधीश माधबेन्द्रराज रेग्मीको इजलासले मुलुकी ऐनको जबरजस्ती करणी महलको दफा १ अनुसार बलात्कारको कसुर ठहर गरी जबरजस्ती करणी बमोजिम ६ वर्ष कैद र शिक्षक जस्तो संरक्षक मानिएको व्यक्तिले आफ्नै विद्यार्थीलाई जबरजस्ती करणी गरेको देखिन आएकोले मुलुकी ऐन जबरजस्ती करणीको महल बमोजिम थप पाँच वर्षगरी ११ वर्ष कैद सुनाएको हो ।

आफ्नै विद्यार्थीलाई डरत्रास देखाई ०७२ चैत १६ गतेदेखि पटक-पटक यौन दुर्व्यवहार र बलात्कार गरेको भन्दै पीडित पक्षले ०७३ जेठ २७ गते जिल्ला प्रहरी कार्यालयमा उजुरी दिएको थियो ।

पीडित बालिकाको स्वास्थ्य परीक्षण जिल्ला अस्पतालमा जेठ २८ गते भएको प्रहरीले जनाएको छ । आरोपितलाई प्रहरीले जेठ २८ गते गिरफ्तार गरेको थियो ।

मिना बुढाथोकी