बलात्कार गरेको कसुरमा १० वर्ष एक महिना कैद सजायको फैसला

 

१६ वर्षीया बालिकालाई बलात्कार गरेको कसुरमा जिल्ला अदालतले याङवरक गाउँपालिका–१ का १९ वर्षीय सायल भनिने मनकुमार तामाङलाई १० वर्ष एक महिना कैद सजायको फैसला गरेको छ ।

जिल्ला अदालतका न्यायाधीश टेकेन्द्र दाहालको ०८० जेठ १४ गतेको इजलासले कसुर गरेको ठहर गर्दै बलात्कार गरेकोमा १० वर्ष र बाल विवाह गरेको कसुरमा एक महिना आदेश भएको अदालतका निमित्त श्रेस्तेदार कुमार निरौलाले बताउनु भयो । पीडितले पाउने गरी कसुरदारबाट ५० हजार रुपियाँ क्षतिपूर्ति भराउन समेत अदालतले आदेश दिएको छ ।

पीडित बालिकालाई आरोपितले ०७७ पुस ८ गते बलात्कार गरेको आरोपमा पीडित पक्षले आरोपितविरूद्ध २४ गते जिल्ला प्रहरी कार्यालयमा उजुरी दिएको थियो ।

आरोपितलाई प्रहरीले ०७७ चैत १२ गते घरबाट गिरफ्तार गरी जिल्ला अदालतमा चैत २३ गते बलात्कार र बालविवाह शीर्षकमा मुद्दा दर्ता गरी कारबाही अघि बढाएको थियो ।

जिल्ला अदालतका तत्कालीन न्यायाधीश योगेन्द्रप्रसाद शाहको ०७७ चैत २५ गतेको आदेशले आरोपित पुर्पक्षका लागि थुनामा थिए ।

पीडित बालिकाको स्वास्थ्य परीक्षण जिल्ला अस्पतालमा ०७७ चैत १२ गते गरिएको थियो ।


सहमान विश्वकर्मा