बलात्कार गरेको कसुरमा १० वर्षकैदको फैसला

 

१८ महिने बालिकालाई बलात्कार गरेको कसुरमा विराटनगर महानगरपालिका-१७ का २२ वर्षीय अरिफ अलीलाई  जिल्ला अदालत मोरङले असार ७ गते १० वर्षकैदको फैसला सुनाएको छ ।

न्यायाधीश नारायणप्रसाद शर्माको इजलासले अलीलाई कैदसँगै २० हजार रुपियाँ पीडित पक्षलाई क्षतीपूर्ति भराउने फैसला गरेको जिल्ला अदालत ६ नं. फाँटका नायव सुब्बा रूद्र खड्काले जानकारी दिए ।

गत मङ्सिर ७ गते चिया खान पसलमा गएको बेला एक्लै खेल्दै गरेकी बालिकालाई अलीले बलात्कार गरेको भन्दै सोही दिन पीडितका आफन्तले इलाका प्रहरी कार्यालय रानीमा उजुरी दिएका थिए ।

उजुरीपछि प्रहरीले सोही दिन अलीलाई गिरफ्तार गरी अनुसन्धानपछि मङ्सिर १८ गते अदालतमा मुद्दा दर्ता गरेको थियो । पीडित बालिकाको स्वास्थ्य परीक्षण मङसीर ७ गते कोशी अञ्चल विराटनगरमा गरिएको थियो ।


इन्दिरा भट्टराई