बलात्कार गरेको कसुरमा सात वर्ष कैद सजायको फैसला

  ०७९ असार २१ गते

१९ वर्षीया युवतीलाई बलात्कार गरेको कसुरमा जिल्ला अदालतले याङवरक गाउँपालिका–६ का २७ वर्षीय आइतराज योङहाङलाई सात वर्ष कैद सजायको फैसला सुनाएको छ ।

जिल्ला अदालतका न्यायाधीश योगेन्द्रप्रसाद शाहको असार २० गतेको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट २५ हजार रुपियाँ क्षतिपूर्ति र पीडित राहत कोषमा १८ हजार रुपियाँ भराउन आदेश भएको अदालतका श्रेस्तेदार विश्वजङ्ग सिजापतीले इन्सेक प्रतिनिधिसँगको भेटमा बताउनु भयो ।

पीडितलाई आरोपितले ०७६ साउन १७ गते बलात्कार गरेको आरोपमा पीडित पक्षले आरोपितविरूद्ध ०७७ जेठ २९ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले ०७७ जेठ २ गते गिरफ्तार गरेको थियो ।

आरोपितविरूद्ध प्रहरीले जिल्ला अदालतमा ०७७ जेठ २५ गते बलात्कार शीर्षकमा मुद्दा दर्ता गरेको थियो ।

पीडितको स्वास्थ्य परीक्षण जिल्ला अस्पतालमा ०७७ जेठ २ गते गरिएको थियो ।


सहमान विश्वकर्मा