बलात्कार गरेको कसुरमा सात वर्ष कैद सजायको फैसला

  ०७७ चैत २ गते

२२ वर्षीया युवतीलाई बलात्कार गरेको कसुरमा जिल्ला अदालतले जलजला गाउँपालिका४ का ३२ वर्षीय रविन भन्ने रवि जिसीलाई सात वर्ष कैद सजायको फैसला सुनाएको छ ।

 जिल्ला अदालत पर्वतका न्यायाधीश बलराम त्रिपाठीको चैत १ गतेको इजलासले कसुर ठहर गर्दै जबरजस्तीकरणी कसुरमा आरोपितलाई सात वर्ष कैद सजाय र ५० हजार रुपियाँ क्षतिपुर्तिको फैसला गरेको पर्वत जिल्ला अदालतका सूचना अधिकारी रामबहादुर थापाले इन्सेक प्रतिनिधिलाई बताउनुभयो ।

 पीडितलाई आरोपितले ०७७ जेठ १६ गते बलात्कार गरेको आरोपमा पीडित पक्षले आरोपितविरुद्ध ०७७ असार ५ गते जिल्ला प्रहरी कार्यालय पर्वतमा उजुरी दिएका थियो ।

 इन्सेकसँगको समन्वयमा उजुरी दर्ता भएपछि पीडित महिलालाई इन्सेक  प्रतिनिधि मार्फत महिला सुरक्षा घरमा व्यवस्थापन गरिएको थियो ।

 पीडित पक्षको उजुरीपछि प्रहरीले आरोपितलाई ०७७ असार ५ गते गिरफ्तार गरेर  जिल्ला अदालतबाट जबरजस्तीकरणी शीर्षकमा मुद्दा दर्ता गरी कारवाही प्रक्रिया अघि बढाएको थियो ।

 जिल्ला अदालत पर्वतको आदेशले आरोपित ०७७ असार १७ गतेदेखि पुर्पक्षको लागि थुनामा थिए ।

 पीडितले अदालतको फैसला भएपछि आफूलाई न्याय पाएको महसुस भएको इन्सेक  प्रतिनिधिलाई फोन मार्फत बताउनुभयो । 


सन्तोष थापा