बलात्कार गरेको कसुरमा पाँच वर्षकैद फैसला

३२ वर्षीया महिलालाई बलात्कार गरेको कसुरमा दोषी ठहर गर्दै शान्तिनगर गाउँपालिका-२ का ३५ वर्षीय रेउले घर्तीलाई जिल्ला अदालतले पाँच वर्षकैद फैसला सुनाएको छ ।

जिल्ला न्यायाधीश चुरामन खड्काको इजलासले वैशाख २१ गते घर्तीलाई पाँच वर्षकैद र पीडितलाई २५ हजार रुपियाँ क्षतिपूर्ति भराउने फैसला गरेको हो ।

पीडित महिलालाई बलात्कार र उनकी ११ वर्षीया छोरीलाई आरोपित घर्तीले ०७३ फागुन १३ गते बलात्कार प्रयास गरेको भन्दै पीडित पक्षले फागुन १८ गते इलाका प्रहरी कार्यालय तुलसीपुरमा जाहेरी दिएका थिए ।

जिल्ला अदालतले बालिकालाई आशय करणी भएको ठहर गरेको छ । पीडित पक्षले उजुरी दिएपछि फागुन १९ गते घर्तीलाई गिरफ्तार गरी मुद्दा चलाइएको थियो ।

दुवै जना पीडितको स्वास्थ्य परीक्षण फागुन १८ गते राप्ती अञ्चल अस्पतालमा भएको थियो ।


जे.एन.सागर