समाचारहरू

१३ वर्षीया बालिकालाई बलात्कार गरेको कसुरमा बेलकोटगढी नगरपालिका–४ डाँडाखर्कका ६८ वर्षीय केदारबहादुर भन्ने ऋषिबहादुर बाँसकोटालाई जिल्ला अदालत नुवाकोटले ०७९ फागुन २ गते  दुई वर्ष कैद सजायको फैसला गरेको छ ।  

जिल्ला न्यायाधीश मदनबहादुर धामीको इजलासले अन्तिम फैसलामा अभियोगमा आंशिक दाबी पुग्ने ठहर गर्दै दुई वर्ष कैद सजाय, २० हजार जरिवाना र २५ हजार रुपैयाँ  पीडितलाई क्षतिपुर्ति भराउन समेत आदेश भएको जिल्ला अदालतको सूचना अधिकारी तथा इजलास अधिकृत रीता लामिछानेले जानकारी दिनुभयो ।  

बालिकालाई बाँसकोटाले ०७७ मङ्सिर २४ गते बलात्कार गरेको भन्दै जिल्ला प्रहरी कार्यालयमा मङ्सिर २९ गते उजुरी दर्ता भएको थियो ।  

पीडित बालिकाको स्वास्थ्य परीक्षण मङ्सिर २९ गते त्रिशूली अस्पतालमा गरिएको थियो ।  

जिल्ला अदालतले आरोपित बाँसकोटालाई ०७७ पुस १६ गते पुर्पक्षको लागि थुनामा राख्न आदेश दिएको थियो ।  

नवदीप श्रेष्ठ