समाचारहरू

११ वर्षीया बालिकालाई बलात्कार गरेको कसुरमा जिल्ला अदालतले चार जना दोषीलाई फरकफरक सजाय तोकेको छ ।

११ वर्षीया बालिकालाई बलात्कार गरेको कसुरमा अदालतले फिदिम नगरपालिका–११ का चित्रे भनिने ३० वर्षीय आकाश आङबोलाई जन्मकैद र फालेलुङ गाउँपालिका–८ का २८ वर्षीय प्रेमराज हाङसरुम्बालाई २० वर्ष कैद सजाय फैसला गरेको छ ।

जिल्ला अदालतका न्यायाधीश टेकेन्द्र दाहालको चैत १७ गतेको इजलासले कसुर गरेको ठहर गर्दै पीडितले पाउने गरी कसुरदारहरुबाट १÷१ लाख रुपियाँ क्षतिपूर्ति भराउन आदेश भएको अदालतका श्रेस्तेदार विश्वजङ्ग सिंजापतिले बताउनु भयो ।

सोही आदेशले घटनाका दोषी १५ वर्षीय बालकलाई जन्मकैद र १४ वर्षीय बालकलाई २० वर्ष कैद सजाय तोकिएको छ । कसुरदार ठहर भएका दुई जना नाबालक रहेकोले बालबालिका सम्बन्धी ऐन २०७४ को दफा ३६(३) र मुलुकी अपराध संहिता २०७४ को दफा ४५(३) अनुसार आधा मात्र सजाय हुने श्रेस्तेदार सिजापतीले बताउनु भयो ।

पीडित बालिकालाई चित्रे भनिने आकाश आङबोले ०७८ मङ्सिरमा, प्रेमराज हाङसरुम्बाले ०७८ पुसमा १५ वर्षीय बालकले पुस १७ गते र १४ वर्षीय बालकले ०७८ साउनमा बलात्कार गरेको आरोपमा पीडित पक्षले आरोपित चारै जनाविरुद्ध ०७८ पुस १६ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीलगत्तै आरोपितलाई प्रहरीले गिरफ्तार गरेको थियो ।

आरोपितविरुद्ध प्रहरीले जिल्ला अदालतमा ०७९ कात्तिक ७ गते बलात्कार शीर्षकमा मुद्दा दर्ता गरेको थियो ।

जिल्ला अदालतका तत्कालीन न्यायाधीश योगेन्द्रप्रसाद शाहको ०७९ वैशाख ६ गतेको इजलासले आरोपितमध्ये वयस्कलाई पुर्पक्षका लागि थुनामा र दुई जना बालकलाई बाल सुधारगृह पठाउन आदेश दिएको थियो ।

 

सहमान विश्वकर्मा