बलात्कार गरेको कसुरमा जन्म कैद सजायको फैसला

  ०७९ वैशाख ६ गते

१६ वर्षीया छोरीलाई बलात्कार गरेको कसुरमा जिल्ला अदालतले ४६ वर्षीय बाबुलाई जन्मकैद सजायको फैसला सुनाएको छ ।

जिल्ला अदालतका न्यायाधीश योगेन्द्रप्रसाद शाहको वैशाख ५ गतेको इजलासले कसुर गरेको ठहर गर्दै कैद सजायसँगै कसुरदारबाट पीडित राहत कोषमा २८ हजार रुपियाँ भराउन आदेश भएको अदालतका श्रेस्तेदार विश्वजङ्ग सिजापतीले इन्सेक प्रतिनिधिसँगको भेटमा बताउनु भयो ।

पीडितलाई आरोपितले ०७६ माघ ७ गते बलात्कार गरेको आरोपमा पीडित पक्षले आरोपितविरूद्ध माघ ९ गते जिल्ला प्रहरी कार्यालयमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले ०७६ माघ ९ गते गिरफ्तार गरेको थियो ।

आरोपितविरूद्ध प्रहरीले जिल्ला अदालतमा ०७६ माघ २७ गते हाडनाता करणी शीर्षकमा मुद्दा दर्ता गरेको थियो ।

पीडितको स्वास्थ्य परीक्षण जिल्ला अस्पतालमा ०७६ माघ ९ गते गरिएको थियो ।

जिल्ला अदालतले १७ वर्षीया बालिकालाई बलात्कार गरेको कसुरमा तेहृथुम जिल्ला आठराई गाउँपालिका–४ का २९ वर्षीय प्रेमकुमार खातीलाई १० वर्ष कैद सजायको फैसला गरेको छ ।

न्यायधीश योगेन्द्रप्रसाद शाहको वैशाख ५ गतेको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट ५० हजार रुपियाँ क्षतिपूर्ति भराउन आदेश भएको अदालतका श्रेस्तेदार विश्वजङ्ग सिजापतीले बताउनु भयो ।

पीडितलाई आरोपितले ०७७ मङ्सिर ३ गते बलात्कार गरेको आरोपमा पीडित पक्षले आरोपितविरूद्ध पुस २६ गते जिल्ला प्रहरी कार्यालयमा उजुरी दिएको थियो ।

प्रहरीले आरोपितलाई ०७७ पुस २६ गते गिरफ्तार गरी सोही दिन जिल्ला अदालतमा बलात्कार शीर्षकमा मुद्दा दर्ता गरेको थियो ।

पीडितको स्वास्थ्य परीक्षण जिल्ला अस्पतालमा पुस २६ गते गरिएको थियो ।

जिल्ला अदालतले २३ वर्षीया महिलालाई बलात्कार गरेको कसुरमा फाल्गुनन्द गाउँपालिका–६ का ५४ वर्षीय भीमबहादुर आङदेम्बेलाई १० वर्ष कैद सजायको फैसला सुनाएको छ ।

न्यायाधीश योगेन्द्रप्रसाद शाहको वैशाख ५ गतेको इजलासले कसुर गरेको ठहर गर्दै कैद सजायसँगै कसुरदारबाट ५० हजार रुपियाँ क्षतिपूर्ति भराउन आदेश भएको अदालतका श्रेस्तेदार विश्वजङ्ग सिजापतीले बताउनु भयो ।

पीडितलाई आरोपितले ०७८ जेठ २९ गते बलात्कार गरेको आरोपमा पीडित पक्षले आरोपितविरूद्ध जिल्ला प्रहरी कार्यालयमा असार २ गते उजुरी दिएको थियो ।

पीडित पक्षको उजुरीका आधारमा प्रहरीले आरोपितलाई असार २ गते गिरफ्तार गरी जिल्ला अदालतमा असार २५ गते बलात्कार शीर्षकमा मुद्दा दर्ता गरेको थियो ।

जिल्ला अदालतका न्यायाधीश योगेन्द्रप्रसाद शाहको साउन २० गतेको इजलासले आरोपित पुर्पक्षका लागि थुनामा थिए ।

पीडितको स्वास्थ्य परीक्षण जिल्ला अस्पतालमा असार २ गते गरिएको थियो ।


सहमान विश्वकर्मा